Cesga

 0 voto(s)

Martes 22/01/2013 18:28

CARTOGALICIA E CESGA FACILITARÁN Á COMUNIDADE CIENTÍFICA EN GALICIA Os DATOS PRODUCIDOS POLA REDE GALNET DE POSICIONAMENTO GNSS

• Cartogalicia desenvolveu o primeiro servizo de Galicia de posicionamento de alta precisión capaz de traballar coas constelacións de satélites GPS, GLONASS e a futura GALILEO
• CESGA achegará a súa infraestrutura para redundar e securizar o servizo de datos.
• Os investigadores das universidades e OPIs en Galicia poderán acceder aos datos sen custo asociado.

A firma Cartogalicia deseñou GALNET nos últimos anos como unha rede complementaria do Sistema Global de Navegación por Satélite (GNSS) que cobre todo o territorio galego, dando resposta a unha crecente demanda en servizos de posicionamento por satélite, tal como explica na súa web. Agora, froito dun convenio entre CESGA e Cartogalicia, os membros da comunidade científica galega poderán acceder gratuitamente ás observacións dispoñibles grazas a esa rede.

A información obtida axuda a conseguir unha maior precisión, explican desde Cartogalicia, a partir das medicións das constelacións de aparellos que manteñen en órbita os consorcios GPS ou GLONASS, que no seu conxunto constitúen o GNSS. GALNET convértese así no primeiro servizo en Galicia de posicionamento de alta precisión con receptores con capacidades para procesar os datos das constelacións GPS, GLONASS e a futura GALILEO.

Os sistemas globais de navegación por satélite foron deseñados para achegar por si mesmas precisións da orde de entre dúas e tres metros. Coa tecnoloxía existente hoxe non é posible conseguir unhas medicións máis precisas desde un punto de vista global, pero si no ámbito local: GALNET calcula os erros locais permitindo corrixir o sinal procedente dos satélites e mellorar a precisión ata que os erros sexan como máximo de centímetros.

A rede dispón de receptores GNSS que constitúen estacións basee repartidas por todo o territorio galego, cunha distancia entre elas de entre 60 e 70 quilómetros, e que monitorizan os sinais dos satélites dos sistemas GPS e GLONASS. Estes receptores atópanse en posicións coñecidas, de forma que cando se compara a posición calculada en base á información dos satélites coa posición coñecida previamente, despéxanse os erros que o sistema de navegación está a cometer en cada instante.

Os datos brutos para corrección diferencial producidos pola rede -en ficheiros para postprocesado- difundiranse sen custo asociado a membros da comunidade científica en Galicia e poderán ser incorporados para a execución de proxectos de investigación, desenvolvemento e innovación (I+D+i). O marco de referencia usado é geodésico en ETRS89, que como referencia oficial substitúe ou complementa as tradicionais redes geodésicas.

Estes datos confórmanse como un compoñente básico para a infraestrutura xeográfica de Galicia, que é unha das liñas de actuación do Instituto de Estudos do Territorio (Consellería de Medio Ambiente, Territorio e Infraestruturas). Este organismo ten entre os seus fins a coordinación e difusión da información xeográfica e cartográfica, así como, incentivar a innovación, adopción e desenvolvemento de tecnoloxías e infraestruturas propias nos campos de información xeográficas do territorio galego.

Para a difusión dos datos utilízase exclusivamente Internet, e poderase acceder a eles desde un computador de sobremesa ou cando se trate de medicións de campo mediante teléfonos móbiles ou con dispositivos que operen con ligazóns de radio.

A firma do acordo de colaboración favorece ao colectivo científico de Galicia, xa que ata a data non dispuña dunha rede deste tipo en Galicia.

http://www.cartogalicia.com

ou contacte con:
Fernando Bouzas
CESGA +34 981 569810
fbouzas(at)cesga(dot)é